البنت بتاعة الفول - للكاتب بركات معبد
البنت بتاعة الفول النابت
زودت الشطة ف طبق الصبح النازل
بابجامته الكروهات
كانت تتعمد تفتح أخر زرارين
من صدر التوب المنشور
على فرع التوت النازل من خد الليل
وتزود قد تلات فناجين من جركن مية
واقف كيف المسطول لما تشد النار همتها
وتراقص تعابين الحتة الفرافير
بشايف متعاصة ابتسامات
تعقد حواجبها بغضب الغيرة
كل ما تسمع خبطة ركبي من عقب الشارع
مع أول مشوار ملزوق على حيط الفكهاني
جريت تمسح دمعتها بطرف الطرحة
رفعت غطيان الحلل المشبوكة مع البوابير
تلعن أبو خاش المشواير
تلعن أبو خاش الفاكهة البايته ف قفص الفكهانى
وف يوم وانا متنتور على حجر الإسفلت
كانت تفاحة بتعصر توبها الوردى
وترش عليه حكايات
منقوشه برغي بنات طاله من الشبابك
البنت بتاعة الفول النابت
أصلا بتغير
كانت بتحب
كانت بتحب تداري الفرحة بطرف الحلم
كانت تحلم بشفايف الفجر
تلامس شباك الحظ المتمسمر
على عمر بتسرب من غير ما تحس
كانت تحلم بسرير ودولاب
ومراية صغيرة
تعكس ضحكتها المتشالة لعوزه الأيام
بصت من تحت جفونها
يمكن تسمع صوت
متسلل من ورا عقب العتمة
ينشر ريحة الفرحة ف غليان المية
تغسل ايدها المدفونة ف ملح التوهة
وتنشف أوراق الصبر المتعلق
جوه سنين الخوف
المشاهدات:
..
الناشر Unknown
on 5:53 ص. تابع قسم
الشعر الشعبي والغنائي
.
الموضوع يعبّر عن رأي كاتبه لمراسلتنا، اضغط هنا.
