رجع النهار - للشاعر مقبل غريب

رجع النهار و الفجرية سهرانة مستنية
قبل الليل ما يعتم
تنور شمس النهار على جبينك
قبل الادان ما يادن
ف عز الضهرية كان فرحك
وصوت البارود مع التكبيرة والزغرودة
يتكلم
يقول الله على العزيمة و الاصرار
بين ايدين ولادك الشجعان
خلي الدنيا تتعلم
امبارح كان الانتصار
امبارح رجع النهار
امبارح رجعنا سينا
و بادينا اخدنا بالتار
بدمانا و اروحنا
رسمنالك يا مصر عيد
و من تاني رجع النهار
يا بلدنا
**************************
وسط المدافع و الطيرات
بين المواقع و الدبابات
فوق النيران
تحت النيران
اجري و اقاتل يا بلدي
شايل همومك على كتفي
ودمعتك جوايا بركان
يغلي يشعلل ف عروقي
يشوي عدو مغرور جبان
يجري..يسيل على رملتك
يطهرها من الاحزان
يمحي سنين غربتك
و يلبسك توب النهار
يا بلدنا
**************************
امبارح عدينا القنال
كل الدنيا قالت محال
ارجع يا مصري
دول مش عيال
دي اسرائيل و وراها امريكا
وساتر ترابي علو الجبال
قلت في الميدان كلمتي
علمتهم درس النضال
و وطيت على جبينك
اسجد لربي و اسميلك
ابوس اقدامك وايدينك
و اغني للنصر مواويلك
واكبرلك رجع النهار
يا بلدنا
***********************
يا بلدي يمر الزمان
وتروح حكام ورا حكام
و ما يحمل همك
ولا يمسح دمعك
الا ولادك الجدعان
فلاح بالخضرة يحني سمارك
و عامل في المصنع عرقان
وشباب زي الورد بتشقى
بتعمر في كل مكان
وبنات قمرات زي الشربات
دايما صابرين
في الشده واقفيت صامدين
في المصنع يغزلوا تيابك
و بايديهم يداووا جراحك
هما دوول يا بلدنا
اللي رجعوا شمس النهار
هما دوول يا بلدنا
اللي حققوا الانتصار
تعيشي و تفرحي يا بلدنا
ونهارك يسكن كل دار
رجع النهار
يا بلدنا
****************************
اهداء
الي شعب مصر العظيم
مقبل غريب

الناشر Unknown on 6:45 ص. تابع قسم الشعر الشعبي والغنائي . الموضوع يعبّر عن رأي كاتبه لمراسلتنا، اضغط هنا.