دموع العين - للشاعر يسري علي محمد البطاط

بدال الآه بقولها اتنين

آه فى القلب عشان جواه للماضى حنين

والآه التانيه بتبكى العين

عشان بتشوف حاضرها حزين

عينى اليسرى بتبكى

من حاضر مليَـان جراح على ماضى وَلـّى وراح

ساكن فى عِينى اليمين

زمان كُـنتْ صُغيـْر لا عُمرْ قلبى اتغيْـر ولا عُمرْ عقلى اتحيْـر

ولا عُمرى شفت ناس بالفطره كده خاينين

كان لمّا الخطر يشّـتدْ نشوف الإيدين تتـّمدْ ونشوف سفينة نوح

بـتـنجّـى الطيبـين

يا خسارة الأيامْ هَـجْر وُبكا وخصامْ لله وحده الدوام ْ

الماضى راح على فيـن

على نن عِينى يا عِينى مش بس حبيبى ناسينى

ده اللّى اشتريتُه بالغالى بالرخيص ينسانى

واللى صاحبته سنين كان الفراق فى ثوانى

حتى يا ناس خِلانى فجْأه صاروا ظالميـن

كان فى الماضى أمانْ الحاضر فيه حرمانْ حرام عليك يا زمانْ

ارحم دموع العيـن

لو إنى يونس للبحر هنزل ومش هخاف

لو إنى يوسف أكيد هكون عامل حسابى فى سنين عجاف

لكن هو أنا م المرسلين ؟؟!!

لو إنى أيــوب كُـنْت هصبُرْ لو انى موسى كُـنْت أهاجر

لو إنى محمد هدعى ربى عشان الماضى يكون حاضر

يارب اجعل الماضى حاضر

يا رب آمين

يسرى على محمد البطاط

الناشر Unknown on 7:56 ص. تابع قسم الشعر الشعبي والغنائي . الموضوع يعبّر عن رأي كاتبه لمراسلتنا، اضغط هنا.